IPL 2026 - ਬੈਂਗਲੁਰੂ ਨੇ ਟਾਸ ਜਿੱਤ ਕੇ ਦਿੱਲੀ ਨੂੰ ਪਹਿਲਾਂ ਬੱਲੇਬਾਜ਼ੀ ਲਈ ਦਿੱਤਾ ਸੱਦਾ

IPL 2026 ਦੇ ਮਹੱਤਵਪੂਰਨ ਮੁਕਾਬਲੇ ਵਿੱਚ ਰਾਇਲ ਚੈਲੇਂਜਰਜ਼ ਬੈਂਗਲੁਰੂ ਨੇ ਨਵੀਂ ਦਿੱਲੀ ਦੇ ਅਰੁਣ ਜੇਤਲੀ ਸਟੇਡੀਅਮ ਵਿੱਚ ਟਾਸ ਜਿੱਤ ਕੇ ਪਹਿਲਾਂ ਗੇਂਦਬਾਜ਼ੀ ਕਰਨ ਦਾ ਫੈਸਲਾ ਕੀਤਾ। ਬੈਂਗਲੁਰੂ ਦੇ ਗੇਂਦਬਾਜ਼ਾਂ ਨੇ ਸ਼ੁਰੂ ਤੋਂ ਹੀ ਦਬਾਅ ਬਣਾਇਆ। ਭੁਵਨੇਸ਼ਵਰ ਕੁਮਾਰ ਨੇ ਪਹਿਲੇ ਓਵਰ ਵਿੱਚ ਹੀ ਖ਼ਤਰਨਾਕ ਯਾਰਕਰ ਨਾਲ ਸਾਹਿਲ ਪਾਰਖ ਨੂੰ ਪੈਵਿਲੀਅਨ ਭੇਜ ਦਿੱਤਾ, ਜਦਕਿ ਅਗਲੇ ਓਵਰ ਵਿੱਚ ਜੋਸ਼ ਹੇਜ਼ਲਵੁੱਡ ਨੇ ਕੇਐਲ ਰਾਹੁਲ ਅਤੇ ਸਮੀਰ ਰਿਜ਼ਵੀ ਨੂੰ ਆਊਟ ਕਰਕੇ ਦਿੱਲੀ ਦੀ ਟੀਮ ਨੂੰ ਵੱਡਾ ਝਟਕਾ ਦਿੱਤਾ।

ਦਿੱਲੀ ਕੈਪੀਟਲਸ ਨੇ ਆਪਣੀ ਪਲੇਇੰਗ ਇਲੈਵਨ ਵਿੱਚ ਦੁਸ਼ਮੰਥਾ ਚਮੀਰਾ ਅਤੇ ਕਾਇਲ ਜੈਮੀਸਨ ਨੂੰ ਸ਼ਾਮਲ ਕਰਦੇ ਹੋਏ ਕੁਝ ਬਦਲਾਅ ਕੀਤੇ, ਜਦਕਿ ਬੈਂਗਲੁਰੂ ਨੇ ਆਪਣੀ ਜਿੱਤੂ ਟੀਮ 'ਤੇ ਭਰੋਸਾ ਜਤਾਇਆ। ਹਾਲਾਂਕਿ, ਦਿੱਲੀ ਲਈ ਇਸ ਸੀਜ਼ਨ ਵਿੱਚ ਸਭ ਤੋਂ ਵੱਡੀ ਸਮੱਸਿਆ ਉਨ੍ਹਾਂ ਦੀ ਗੇਂਦਬਾਜ਼ੀ ਰਹੀ ਹੈ। ਟੀਮ ਨੇ ਪਿਛਲੇ ਪੰਜ ਵਿੱਚੋਂ ਚਾਰ ਮੈਚਾਂ ਵਿੱਚ ਵਿਰੋਧੀਆਂ ਨੂੰ 210 ਤੋਂ ਵੱਧ ਸਕੋਰ ਕਰਨ ਦਿੱਤਾ ਹੈ, ਜਿਸ ਨਾਲ ਉਨ੍ਹਾਂ ਦੀ ਰਣਨੀਤੀ 'ਤੇ ਸਵਾਲ ਉੱਠ ਰਹੇ ਹਨ।

ਉੱਧਰ, ਲੁੰਗੀ ਨਗੀਡੀ ਦੀ ਸੱਟ ਵੀ ਟੀਮ ਲਈ ਚਿੰਤਾ ਦਾ ਵਿਸ਼ਾ ਹੈ, ਜੋ ਪਿਛਲੇ ਮੈਚ ਦੌਰਾਨ ਫ਼ੀਲਡਿੰਗ ਕਰਦੇ ਸਮੇਂ ਜ਼ਖ਼ਮੀ ਹੋ ਗਿਆ ਸੀ। ਦੂਜੇ ਪਾਸੇ, ਰਜਤ ਪਾਟੀਦਾਰ ਦੀ ਅਗਵਾਈ ਹੇਠ ਬੈਂਗਲੁਰੂ ਦੀ ਟੀਮ ਸ਼ਾਨਦਾਰ ਫਾਰਮ ਵਿੱਚ ਹੈ ਅਤੇ ਸੱਤ ਵਿੱਚੋਂ ਪੰਜ ਮੈਚ ਜਿੱਤ ਕੇ ਅੰਕ ਸੂਚੀ ਵਿੱਚ ਦੂਜੇ ਸਥਾਨ 'ਤੇ ਕਾਇਮ ਹੈ। ਬੈਂਗਲੁਰੂ ਇਸ ਮੈਚ ਰਾਹੀਂ ਦਿੱਲੀ ਤੋਂ ਪਹਿਲਾਂ ਮਿਲੀ ਹਾਰ ਦਾ ਹਿਸਾਬ ਚੁਕਾਉਣ ਦੇ ਇਰਾਦੇ ਨਾਲ ਮੈਦਾਨ ਵਿੱਚ ਉਤਰੀ ਹੈ।